ताप्लेजुङ/ भीरमा लागेको डढेलोले जिल्लाको सिरिजंगा गाउँपालिका ३ तेल्लोकको फुन्द्रुवा आधारभूत विद्यालय भवन जलेको छ ।
विद्यालय भवनको पश्चिमपट्टि रहेको शहरेभित्ता भीरबाट आएको डढेलोले कार्यालय सञ्चालनमा रहेको तीन कोठे भवन जलेको गाउँपालिकाका वडा सदस्य चन्द्र पराले जानकारी दिए । उनका अनुसार एउटा भवन भने अभिभावक र शिक्षकले जोगाएका छन् । कार्यालयको खातालगायत सामग्री निकाल्ने प्रयास गरेका टंक भट्टराई घाइते भएका छन् ।

विद्यालयका कुनै पनि सामग्री र कार्यालयको कागजपत्र निकाल्न नपाएको प्रधानाध्यापक सम्झना भट्टराईले बताइन् । ‘सबैजना सरहरु आ(आफ्नो कक्षामा पढाउँदै हुनुहुन्थ्यो । म कार्यालयमा काम गर्दै थिएँ,’ सम्झनाले भनिन्, ‘कार्यालय नजिकै आगो आइपुग्दा मात्रै थाह पायौं ।’ आगो नजिकै आएपछि शिक्षकले विद्यार्थीलाई सुरक्षित ठाउँमा सारेका थिए । कार्यालयमा कम्युटर, प्रोजेक्टरलगायत सामान समेत जलेका छन् ।